2010, മാർച്ച് 13, ശനിയാഴ്‌ച

പ്രണയം പലനേരത്ത്

ചിലപ്പോഴീ പ്രണയം,
ചില്ലുപാത്രം വിട്ട് പുറത്തുചാടാനൊരുങ്ങുന്ന
ഒരു സ്വര്‍ണമത്സ്യത്തിന്റെ വ്യഗ്രതപോലെ
പുറത്തേയ്ക്ക് വഴികള്‍ തിരഞ്ഞ് .....

പലവട്ടം വന്യഭാവത്തില്‍
കറുത്തകണ്ണുകള്‍ തിളക്കിത്തിളക്കി,
ഭൂതകാലത്തിലേയ്ക്ക് കണ്ണാടികള്‍ തിരിച്ചുവച്ച്
നോക്കാന്‍ പറയുന്നു.....

മഴക്കാലത്ത് കിളിയൊഴിഞ്ഞുപോയ
ഒരു കൂടുപോലെ,ആര്‍ക്കും ചേക്കേറാന്‍ പാകത്തില്‍,
ഇനിയുമൊരു മഴക്കാലത്തെ അതിജീവിക്കുമെന്ന് ,
നിശബ്ദം പറഞ്ഞാവും ചിലപ്പോള്‍
കാത്തിരിക്കുന്നത്.......

അപൂര്‍വ്വം ചിലനേരത്ത്
ആര്‍ദ്രമായ ഒരു ഗസല്‍ ഗീതം പോലെ....
വീണ്ടും കേള്‍ക്കാന്‍ കൊതിപ്പിച്ച്,
മുഴുവനും മൂളിത്തീരാതെ ,
മുറിഞ്ഞ് മുറിഞ്ഞ് നിശബ്ദമാകുന്നു.....

അതിലും അപൂര്‍വ്വമായി ചിലപ്പോള്‍
ഇരുട്ട് പതിയേ പരക്കവെ ‍
വിളക്കുകാലുകള്‍ക്ക് കീഴെ
വായിച്ചെടുക്കാന്‍ വിടാത്ത
ഭാവങ്ങളുമായി ഉള്ളം കയ്യില്‍
നിന്റെ വിരലുകളുടെ ചെറുചൂടുപോലെ

പലപ്പോഴും യാത്രപറഞ്ഞ്,
പതിയെ അകന്നുപോകുന്ന,
നിന്റെ പദനിസ്വനമാണതിന്....
അപൂര്‍വ്വം ചിലപ്പോഴൊക്കെ,
നിന്റെ തിരിഞ്ഞുനോട്ടങ്ങളും.....

4 അഭിപ്രായങ്ങൾ:

  1. പലപ്പോഴും യാത്രപറഞ്ഞ്,
    പതിയെ അകന്നുപോകുന്ന,
    നിന്റെ പദനിസ്വനമാണതിന്....
    അപൂര്‍വ്വം ചിലപ്പോഴൊക്കെ,
    നിന്റെ തിരിഞ്ഞുനോട്ടങ്ങളും.....

    മറുപടിഇല്ലാതാക്കൂ
  2. അതിലും അപൂര്‍വ്വമായി ചിലപ്പോള്‍
    ഇരുട്ട് പതിയേ പരക്കവെ ‍
    വിളക്കുകാലുകള്‍ക്ക് കീഴെ
    വായിച്ചെടുക്കാന്‍ വിടാത്ത
    ഭാവങ്ങളുമായി ഉള്ളം കയ്യില്‍
    നിന്റെ വിരലുകളുടെ ചെറുചൂടുപോലെ

    മറുപടിഇല്ലാതാക്കൂ
  3. ചിലനേരങ്ങളില്‍ .....
    എത്ര ശാസിച്ചാലും
    അനുസരിക്കാത്ത കുട്ടിയെപോലെ
    കൈവിട്ടു കുതറിയോടും

    മറുപടിഇല്ലാതാക്കൂ